ka titsa’ ki ri’u

Nuestro zapoteco – reflexiones en torno a la lengua

Yo aprendo Zapoteco Didza Xidza.

Usedaru Didza Xidza

Xidza de Yagavila, Oaxaca.

Txi guka tsuna iza gudela runa skwela ki Didza Xidza. Na rudu iza galaj gayuaa yu’u galaj gudelatu runtu tu kursu ga ulusedaka bunatxi iline Didza Xidza kieru. Xunutxízka bunatxi guda’ke na gudelatu. Bukiaj iza nara guka nayaa. Bentu lei tuyubla iza galaj gayuaa yu’u tu un, gude txiuruaa ka bunatxi buzua kwinke lu gitxi ki ga’ke lu kursu ki Didza Xidza. Ornaa gudelatu runtu lei txupa lizú tu iza, yugu iza. Na’a guka gadxi lizú rulu’a Didza Xidza, idu txiuruaa ka bunatxi txi guda’ka yugu lizú txi bentu lei. Raka xbaa yugu iza guna kursu ni, sa ilaa txa wayu’u len ki. Txiguka kiki iza galaj gayuaa yu’u txupa len tsuna uruaa. Iládzga bi gun iza zaa, iza galaj gayuaa yu’u tapa uruaa. Iládzga bala bunatxi ilidxin. Iza na’a gusalajtu tsuna grupu, ati tuz blí, iza zaa rénitu isalajtu tsuna yubla kaa, na ilaa txa walíka yugute.
Lazka iza na’a gusalajtu yu’u tu liben ki kursu ni, tuz ga ruzloru ruluitu zi’ala, ati iza na’a
gudelatu ruluitu yu lati tu baniga kika bunatxi na txi gulizua gana rgelaru. Kursu ni runtu
lei lu interne, runitu dxin zum; naa rkwatu ruitu didza len rusedatu gaka rnaru bipa tua
len Didza Xidza. Yuguka bunatxi ráka lu kursu ni tagixajka lati dumi, nade xupaga gayuaa zua na’a. Tuni runitu lei dxin rigixhajtu yugu tu riyadzaj ki gaka skwela ni. Tibi nu run netu kulen ki guntu kursu ni, tibi nu rgixhaj netu; tibi nu runa kietu dumi tuzkaz dumidona tagixajkabe be ta’be tusedabe naka tu rdubi kietu.